【牛扒體驗大升呢】】牛扒配菜三大原則
牛扒唔孤單 - 揀啱配菜好緊要
食牛扒，唔係淨係食塊肉咁簡單。牛扒係主角，但要有優秀嘅配角先能夠襯托出主角嘅出眾。揀啱配菜，可以將牛扒嘅風味提升到唔同嘅層次，做到1+1 > 2嘅效果。喺屋企，我哋都可以學習簡單嘅牛扒配菜做法，令你嘅牛扒唔再孤單！
揀配菜三大原則
牛扒嘅配菜多種多樣，但只要遵守以下三大原則，就可以確保你揀到合適嘅牛扒配菜：
1. 口味平衡原則
牛扒本身味道豐富，配菜唔好搶走牛扒嘅風頭。例如，如果牛扒已經搭配咗黑椒汁或蘑菇汁，配菜可以揀啲清新少油嘅蔬菜沙律，中和黑椒汁嘅辛辣同牛扒嘅油膩，令整體口感更加豐富。
2. 質地搭配原則
牛扒嘅口感通常都係軟腍多汁，配菜可以揀啲質地相對堅實嘅菜品，增加口感層次。例如炸薯條，外層炸到脆卜卜，搭配牛扒一齊食可以感受唔同嘅口感層次。如果係全熟牛扒，口感已經非常堅實，就可以揀返啲軟腍口感嘅配菜，例如薯蓉或者焗蘑菇，綿密嘅薯蓉，或者軟糯嘅蘑菇可以潤滑全熟牛扒嘅堅實口感，令牛扒口感更加多變。
3. 色彩協調原則
要刺激食慾都係要靠視覺，色彩鮮艷嘅菜品顏色會令人食慾大開。搭配得宜嘅配菜同牛扒嘅顏色，可以令成碟菜更加誘人，打卡都靚啲。牛扒顏色深，可以揀紅色嘅番茄、綠色嘅西蘭花或者黃色嘅三色椒，色彩繽紛嘅配搭可以令牛扒望落去令人更加開胃！
唔同牛扒部位 x 唔同配菜
唔同嘅 Steak Cut 口感可以有好大差異，自不然要搭唔同嘅配菜先能感受到唔同部位最好嘅味道。如果牛扒油脂豐富，就適合夾清新嘅蔬菜作為配菜平衡口味；牛扒口感堅實，就適合搭軟綿綿嘅薯蓉中和口感；牛扒口感軟腍，就適合搭卜卜脆嘅炸薯條或烤蔬菜增加層次感。了解唔同 Steak Cut 嘅特點，幫助我哋更好咁揀配菜。
肉眼牛扒（Ribeye Steak）
肉眼扒位於牛嘅肋骨位置，油花彷如大理石嘅紋理，肉味濃郁，油脂豐富。配菜可以揀啲簡單但能提升口感嘅菜品。肉眼扒口感軟腍，配菜可以選擇烤蔬菜提升牛扒口感層次。同時，肉眼牛扒油脂豐富，可以揀蔬菜沙律平衡油膩口感，仲可以揀鮮豔嘅配菜例如番茄同烤粟米增添牛扒色彩。
西冷牛扒（Striploin / Sirloin Steak）
西冷扒係牛脊嘅一部分，帶有白色嘅肉筋，口感較有韌性，有嚼頭，肉質鮮嫩多汁，肉味濃郁。西冷牛扒肉質鮮嫩，但帶有啲油膩，配菜可以揀烤番薯，番薯嘅甜味可以中和牛扒嘅油膩，增加口感層次。軟糯嘅番薯或薯蓉作為配菜可以同牛扒嘅韌性形成對比，豐富牛扒整體口感。
T-骨牛扒（T-Bone Steak）
T-骨扒係牛脊兩邊嘅肉，一邊係軟腍嘅牛柳肉，一邊係有啲韌性嘅西冷，中間夾住T字形嘅大骨頭。T-骨牛扒同時有軟有實嘅口感，無論咩配菜都十分適合。鍾意脆口嘅配菜可以揀炸薯條或烤蔬菜，增加牛扒口感層次。鍾意嫩滑口感嘅配菜可以揀薯蓉或者焗蘑菇，嫩滑軟糯嘅口感可以更好突顯牛扒嘅肉汁豐富。為咗豐富色彩仲可以揀鮮菜沙律或者烤粟米作為配菜，顏色豐富嘅配菜令人更加開胃。
斧頭扒（Tomahawk Steak）
斧頭扒連住長長嘅牛肋骨，好似把斧頭咁，肉質鮮嫩又多汁，脂肪紋理豐富，厚實多汁。肉味醇厚香濃嘅斧頭扒最啱同清新爽口嘅蔬菜沙律配搭，又或者搭香脆嘅炸薯條增加斧頭扒嘅層次。
經典配菜大公開
牛扒變化多端，配菜嘅種類自然都各式各樣。有啲配菜已經成為咗講到牛扒就必然諗起嘅經典搭配，呢啲配菜有咩特點先可以成為經典搭配呢？
永恆經典嘅薯條
牛扒同薯條，呢個組合係點食都唔會厭嘅經典牛扒孖寶。薯條嘅香脆口感可以同牛扒多汁嘅肉質完美組合，增加成件事嘅口感層次。薯條嘅鹹香仲可以中和牛扒嘅油膩。薯條仲含有豐富嘅碳水化合物，能夠提供人體能量，適合同蛋白質豐富嘅牛扒一齊食。同時，薯仔含有膳食纖維，有助於食物嘅消化。
蔬菜係健康選擇
喺享受美味牛扒嘅同時，配蔬菜唔單止可以增加健康營養，仲可以平衡口感。烤蔬菜係絕佳嘅選擇，喺保留蔬菜營養嘅同時，仲可以增添香脆嘅風味。例如，烤西蘭花、烤甘筍、烤露筍等等，蔬菜嘅甜味可以中和牛扒嘅油膩感，令牛扒口感更清新爽口。西蘭花含豐富嘅維他命 C 同膳食纖維，有助於增強免疫力同促進腸道健康；甘筍有豐富維他命Ａ及胡蘿蔔素，可以明目而且有助肝臟排毒；蘆筍有非常豐富嘅膳食纖維、維他命同礦物質，有防癌抗癌嘅作用。
蘑菇風味濃郁
蘑菇唔單止可以製成蘑菇醬配牛扒，烤蘑菇亦係絕佳嘅牛扒配菜。烤蘑菇外表香脆入面軟糯多汁，同牛扒嘅嚼勁形成對比、一齊食口感層次多變。蘑菇仲含有豐富嘅蛋白質、維他命 D 同微量元素，對人體骨骼健康同免疫力非常有益處。
簡易 DIY 配菜料理
喺屋企鋸扒，黑白大廚上身由頭整到落尾，連配菜都煮埋，唔單止可以控制食材用量同調味，仲可以享受烹飪嘅樂趣。以下落嚟肉肉特賣會分享幾款喺屋企就能輕鬆準備嘅牛扒配菜，保證令你嘅牛扒更好味！
自製炸薯條
好多賣急凍食品嘅鋪頭都可以買得到急凍薯條，但自己喺屋企炸薯條用嚟做牛扒配菜絕對係令成件事升呢！
- 揀新鮮、夠粉嘅薯仔例如 Russet Potato，按自己粗幼嘅喜好切成條狀。
- 切好之後放入清水浸洗 10 分鐘，去除多餘嘅澱粉令薯條更加酥脆，然後將薯條撈出瀝乾水份。
- 用油鍋預熱至 180℃ 左右，可以用一根木筷子插入油鍋裡面，周圍出泡泡就表示溫度適合。將薯條分批落入油鍋開始炸，唔好一次過放入太多導致油溫驟降影響薯條嘅酥脆口感。
- 薯條炸到表面金黃，筷子可以輕鬆插入就可以撈出。將薯條放喺廚房紙上瀝乾油，灑上自己鐘意嘅調味料，撈勻就食得喇！
DIY 炸薯條，口感酥脆，可以搭牛扒之餘仲可以當下午茶食，油炸又得氣炸鍋又得，買一大袋薯仔，切起洗好雪起，隨時攞出嚟解凍一炸就食得。自己炸仲可以控制油嘅質量同用量，更加健康。
烤蔬菜
喺屋企烤蔬菜用嚟做牛扒配菜，可以根據自己同屋企人嘅口味揀蔬菜。常用嘅食材有南瓜、西蘭花、蕃薯同甘筍等等。
- 將蔬菜洗乾淨，切成塊狀或條狀，大細均勻就 OK，可以確保烤嗰陣均勻咁受熱。
- 將切好嘅蔬菜放入大碗，落適量嘅橄欖油、鹽、黑胡椒，同蔬菜撈勻。
- 將蔬菜平鋪喺烤盤上，放入預熱至 200℃ 嘅焗爐，用烤模式（Grill） 焗 20～30 分鐘，焗到蔬菜變軟，表面輕微焦黃就可以。
烤蔬菜作為牛扒配菜唔單止顏色豐富令人食慾大開，仲可以中和牛扒嘅油膩口感，營養豐富有益健康。
嫩烤蘑菇
喺屋企烤製蘑菇作為牛扒配菜，揀新鮮嘅蘑菇係關鍵。最常用嘅菇類有Portobello或者白蘑菇，兩款都有獨特嘅風味。
- 將蘑菇洗淨後，切除根部，用廚房紙吸乾表面嘅水分。
- 將蘑菇放入大碗中，落適量嘅橄欖油、鹽、黑胡椒，撈勻。
- 將蘑菇平鋪喺烤盤上，放入預熱至 180℃ 嘅焗爐入面，焗 15～20 分鐘，焗到蘑菇變軟，表面有些少焦就可以喇。
烤蘑菇口感軟糯，仲含有豐富蛋白質、維他命 D 同礦物質，對骨骼健康同免疫系統益處多多。
喺屋企自己 DIY 做牛扒配菜，唔單止可以控制食材同調味，仲可以享受到烹飪嘅樂趣。下次喺屋企鋸牛扒嗰陣，一定要記得試整埋呢啲配菜，保證令你嘅牛扒餐更加滋味！