【牛扒變腍三部曲】蔗渣價錢食到和牛味道！
簡單三部曲將韌牛扒軟化
和牛---係任何牛魔王、食肉獸對頂尖美味牛肉嘅終極追求，入口即化，嫩滑多汁，因為油脂分佈豐富均衡，真係無得頂！但和牛脂肪多而且貴，對於注重健康、想增肌減脂嘅健身牛扒控嚟講，可能會想揀啲精瘦啲嘅牛扒，最好用蔗渣嘅價錢食到和牛嘅味道！
精瘦牛肉例如草飼牛肉一般都比較韌，尤其係多結締組織嘅部位。咁點樣先可以令又韌又難嚼嘅牛扒變腍呢？其實只需要 3 部曲：
1. 用刀尖喺牛扒上𠝹痕
- 刀痕之間大約有 1cm 嘅距離，每條刀痕大約 1~2cm 長
- 可切斷結締組織，令牛扒變得軟腍
2. 將牛扒平放喺平底盤上，倒入梳打水，覆蓋牛扒。又或者用些少梳打粉好輕薄而平均咁灑上牛扒兩邊，閒置 20 分鐘左右
- 梳打含有碳酸氫鈉，會將肉嘅蛋白質分解，令肉質變腍
- 記得唔好醃太耐，否則會影響牛肉嘅味道
3. 醃完後，倒走梳打水，再用廚房紙印乾，然後就可以調味煎牛扒喇！
- 用梳打水/粉淹過嘅牛肉會顯得比較白同軟身
- 煎牛扒時記得用大火預熱好個平底鑊，咁先可以煎封肉汁，唔會令肉汁流失
用多一種材料鎖住肉汁
如果想牛扒再好味啲，肉汁夠唔夠豐富亦係關鍵條件之一！只需要加多一種材料就可以幫助牛扒鎖住肉汁------咖啡奶（coffee creamer）！用咖啡奶全方位咁覆蓋牛扒，因為咖啡奶含有豐富嘅油脂，當牛扒嘅表面形成一層薄薄嘅油脂膜，煎嗰陣就可以封鎖住水份，令肉汁唔容易蒸發流失，牛扒更加多汁美味！！